VATÍKANRÖLT – Sunnudagsbæn páfans og Péturskirkjan

Vatíkanröltið á sunnudögum hefst á Péturstorginu með sunnudagsbæn páfans. Síðan kynnumst við sögu Vatíkansins, upphafi kristninnar og þeim merku listaverkum sem Péturskirkjan geymir.

Ferðin hefst á Péturstorginu þar sem við hlýðum á sunnudagsbæn páfans, L’Angelus della domenica, sem hefst stundvíslega klukkan 12:00. Mikilvægt er að allir séu mættir á torgið 5–10 mínútum fyrir klukkan 12:00.

Að sunnudagsbæninni lokinni hefjum við leiðsögnina á torginu. Þar förum við yfir sögu Vatíkansins, Péturstorgsins og kirkjunnar, auk þess sem við fræðumst um upphaf kristninnar og Pétur postula.

Á sunnudögum er leiðsögn með hópa inni í Péturskirkjunni ekki leyfð fyrr en klukkan 13:30. Tímann fram að inngöngu nýtum við því til að kynnast sögunni og undirbúa það sem við sjáum inni í kirkjunni.

Að því loknu skoðum við Péturskirkjuna, sem reist var yfir gröf Péturs og geymir mörg meistaraverk endurreisnar- og barokktímans. Þar skoðum við meðal annars Pietà-styttu Michelangelos, hið tignarlega altaristjald Berninis og fjölda annarra glæsilegra listaverka.

Athugið: Í þessari ferð heimsækjum við Péturstorgið og Péturskirkjuna, sem bæði eru í Vatíkaninu. Vatíkanasöfnin og Sixtínska kapellan eru hins vegar ekki hluti af þessari ferð.

Gott að vita

Mæting og öryggisleit: Á sunnudögum þurfa allir gestir að fara í gegnum öryggisleit áður en farið er inn á Péturstorgið. Biðtíminn getur verið mismunandi og því er mikilvægt að mæta tímanlega. Allir þátttakendur þurfa að vera komnir í gegnum öryggisleitina og á tilgreindan fundarstað á torginu 5–10 mínútum fyrir klukkan 12:00.
Öryggisleit: Allir gestir þurfa að fara í gegnum öryggisleit áður en gengið er inn í Péturskirkjuna. Ekki má taka með ál- eða glerflöskur, hnífa, skæri eða önnur oddhvöss áhöld. Stórar töskur og ferðatöskur eru ekki leyfðar og engin farangursgeymsla er við kirkjuna. Best er því að ferðast létt.
Klæðnaður: Péturskirkjan er helgur staður og þar gilda ákveðnar klæðnaðarreglur. Axlir og hné þurfa að vera hulin og ekki er heimilt að fara inn í ermalausum eða mjög flegnum bolum, stuttum pilsum eða stuttbuxum sem ná ekki niður að hnjám. Taka þarf niður hatta og húfur áður en gengið er inn í kirkjuna.
Í þessari ferð heimsækjum við Péturstorgið og Péturskirkjuna, sem bæði eru í Vatíkaninu. Vatíkanasöfnin og Sixtínska kapellan eru hins vegar ekki hluti af þessari ferð.
Ef greiðsluleiðin „Greiða við komu“ (Pay on arrival) er valin er hægt að gera upp í lok ferðar með reiðufé eða greiðslukorti. Einnig er hægt að millifæra á íslenskan bankareikning.